കൊച്ചി: തൃശൂര് പൂരം വെടിക്കെട്ട് നടക്കുന്നതു മൂലം വടക്കുന്നാഥ ക്ഷേത്രത്തിന് കേടുപാടും ബലക്ഷയവും സംഭവിക്കുന്നുണ്ടോയെന്ന് പുരാവസ്തു വകുപ്പില്നിന്നുള്ള വിദഗ്ധ സംഘം പരിശോധന നടത്തുമെന്ന് കേന്ദ്രസര്ക്കാരിനുവേണ്ടി അഡീ. സോളിസിറ്റര് ജനറല് ഹൈക്കോടതിയില് അറിയിച്ചു.
പൈതൃകമന്ദിരമായ ക്ഷേത്രത്തിന്റെ സംരക്ഷണത്തില് വിട്ടുവീഴ്ച പാടില്ലെന്നു കോടതി നേരത്തേ വ്യക്തമാക്കിയ സാഹചര്യത്തിലാണ് ഇക്കാര്യം അറിയിച്ചത്.
തുടര്ന്ന് വെടിക്കെട്ടിന്റെ പ്രകമ്പനം ക്ഷേത്രഘടനയെയും പരിസരത്തെയും ബാധിക്കുന്ന വിവരം, മുന്കരുതല് എന്നിവ സംബന്ധിച്ചു റിപ്പോര്ട്ട് നല്കാന് ജസ്റ്റീസുമാരായ വി. രാജ വിജയരാഘവന്, കെ.വി. ജയകുമാര് എന്നിവരടങ്ങുന്ന ദേവസ്വം ബെഞ്ച് കേന്ദ്രസര്ക്കാരിന് നിര്ദേശം നല്കി.
പുരാവസ്തു വകുപ്പിന്റെ അനുമതിയില്ലാതെ കഴിഞ്ഞവര്ഷം ക്ഷേത്രത്തോടു ചേര്ന്ന് വെടിക്കെട്ട് നടത്തിയത് ഗോപുരങ്ങള്ക്കും കൂത്തമ്പലത്തിനും ബലക്ഷയമുണ്ടാക്കിയെന്നാരോപിച്ച് എന്.കെ. മോഹന്ദാസ് എന്ന ഭക്തന് ഓംബുഡ്സ്മാന് നല്കിയ പരാതി ഹൈക്കോടതിയുടെ പരിഗണനയ്ക്കെത്തുകയായിരുന്നു.ഹര്ജി ഒക്ടോബര് ഒമ്പതിന് പരിഗണിക്കും.
Deepika
E-paper LOGIN
LOGIN